Тешко е да се долови важноста на добриот сон. Сите знаеме колку е тешко да станеме наутро од нашата топла постела, ако не сме доволно наспани. Знаеме и колку може да се вознемириме кога ќе си легнеме в кревет и со часови да гледаме во таванот, додека ни се вртат различни мисли низ главата.

Недостигот од добар и квалитетен сон не влијае само на расположението, туку и на рамнотежата на хормоните во телото. Нашата хормонска рамнотежа игра важна улога во справувањето со апетитот, како и со телесната тежина. Што значи дека ако спиеме доволно добро и имаме квалитетен сон, тоа ќе направи голема разлика при решавањето на дебелината.

Без разлика дали не спиете доволно, често се будите или тешко заспивате, постојат многу причини поради кои луѓето се загрижени за квалитетот на сонот. Затоа направивме список совети како да се наспиете и да се чувствувате одморени наутро.

Обидете се:

• Да се придржувате до распоредот за спиење. Ова подразбира да се будите во истото време наутро без разлика кога сте заспале минатата ноќ.
• Да дремнете кратко, од 20 до 30 минути, и така ќе си ги подобрите расположението, концентрацијата и квалитетот на работењето. Но не заборавајте дека ова не може да го надомести недостигот од сон во текот на ноќта. 
• Напијте се чаша топло млеко или чај од камилица за да ви се приспие. Избегнувајте пијалаци што содржат кофеин, како што се кафе и кока-кола.

Избегнувајте:

• Кратки дремки доцна во денот. Тоа може да влијае на сонот во текот на ноќта и да ви го отежне заспивањето во вообичаеното време кога заспивате.
• Да јадете еден или два часа пред да си легнете. Навечер избегнувајте стимулативна храна и пијалаци, како што се црно чоколадо, кафе, чај или газиран сок.
• Да пиете алкохол пред спиење.
• Да пушите пред спиење.

Обидете се:

• Да читате книга или да слушате радио пред спиење. Тоа може да ви го одвлече вниманието и да ви се опушти умот.
• Да правите вежби за релаксација, како што е благо истегнување за да ги опуштите мускулите.
• Да слушате посебна релаксирачка музика, со смирувачко рецитирање на текстот и нежна музика и звучни ефекти што ве опуштаат. Постојат голем број апликации за концентрација и медитација специјално направени за оваа цел.
• Да се искапете со топла вода.

Избегнувајте:

• Напорна физичка активност два часа пред да си легнете да спиете.
• Што било што може да ве вознемири или да ве оптовари со размислување пред спиење.
• Да мислите на работи што ве вознемируваат пред спиење. Ако се чувствувате напнато, вознемирено или раздразливо, направете нешто што ве смирува или ментално ве опушта 5 до 20 минути пред спиење.

Обидете се:

• Спалната соба да е темна, тивка и уредна. 
• Да користите тампони во ушите за да ја намалите можноста да ви се наруши сонот поради звуци, особено ако живеете во бучна средина, како што е градската средина.
• Да ставите дифузер со смирувачки мирис, како што е лавандата.

Избегнувајте:

• Да ги користите креветот и спалната соба за други активности освен за спиење и интимни односи со партнерот. 
• Да јадете в кревет.
• Да користите ТВ, компјутер или мобилен телефон барем 30 минути пред спиење. Истражувањата покажале дека светлината што ја емитуваат екраните може да ве расони.
• Да планирате или да решавате проблеми кога ќе си легнете в кревет.

• Ако не можете да заспиете 15 до 20 минути откако сте легнале да спиете, станете и одете во друга соба. Направете нешто што ве смирува и опушта (погледнете ги советите за опуштање) додека не почувствувате умор. 
• Обидете се да бидете физички активни во текот на денот, дури и да правите вежби со послаб интензитет, како што се стоење или пешачење. 
• Ако сè уште имате проблем со спиењето, не двоумете се да побарате помош. Вашиот лекар ќе ви помогне да најдете начин што вам ќе ви одговара.
• Некои корисни алатки вклучуваат водење дневник за спиење или користење апликации направени за следење на распоредот на спиење, како што е Sleepio. Следењето на спиењето и на активноста во текот на денот, може да ви помогне да разберете што ве спречува да имате квалитетен сон и да се наспиете. Погледнете го дневникот за спиење на Националната здравствена служба (NHS) на Англија.