Сонот има големо влијание врз нашето здравје и квалитетот на животот. Потребни ни се меѓу седум и девет часа добар сон секоја вечер за нашето тело и мозокот да се одморат и закрепнат. Помалку сон од тоа може негативно да влијае на нашата способност за концентрација, нашиот имунолошки систем може да ослаби и на крајот сепак да јадеме повеќе отколку што ни треба, а често тоа е нездрава храна.

Една научна студија покажа дека луѓето што спијат кратко, односно помалку од седум часа на ден, имаат тенденција дневно да внесат 300 калории повеќе од луѓето што спијат доволно. Ова се должи на тоа што ги привлекува храна со повисоко ниво на заситени масти, како што се брзата храна, сирењето и процесираното месо. Во тек на подолг временски период ова дневно зголемување на калорискиот внес е доволно да го зголеми ризикот од дебелина.

Некои од разликите меѓу луѓето кои се добро одморени и луѓето со недостиг на сон може да се забележат во нивото на хормоните во телото. Хормоните се однесуваат како гласници и ја помагаат регулацијата на многу телесни функции, вклучувајќи го и апетитот. Научниците откриле дека луѓето што спијат помалку од пет часа покажуваат зголемено ниво на хормонот грелин и намалено ниво на хормонот лептин.

Грелин е познат како „хормон на глад“ и го зголемува апетитот со тоа што му кажува на нашиот мозок дека е време за јадење. Од друга страна, лептинот прави да престанеме да јадеме со тоа што му кажува на нашиот мозок дека сме сити. Поради промената на нивото на овие два хормона, ние чувствуваме зголемен глад и апетит. Ова може да доведе до зголемување на телесната тежина.

Истата хормонална промена може да настане ако ни е нарушен телесниот часовник. Ова може да се случи ако немате редовен распоред на спиење, ако работите ноќни смени или ако сте изложени на светлина во текот на ноќта. Истражувањата покажаа дека овие фактори може да го зголемат ризикот од развој на дебелина кај луѓето. 

Добрите навики за спиење може да ни помогнат да направиме здрави избори и да ја подобриме нашата способност да ѝ одолееме на примамливата храна. Некои едноставни чекори се да имате точно време на заспивање и на будење и да спиете најмалку 7 часа секоја вечер. За да дознаете повеќе, погледнете ја целосната листа на совети во делот Поддршка и алатки.